Neuigkeiten & Angebote: Simone: "Au Pair of the Year" Finalistin

Simone Staudenmann aus dem Kanton Bern ist ein Glückspilz durch und durch. 2010 gewann sie ihr Au Pair Jahr mit Cultural Care im Wert von 1115,- CHF und nun wurde sie von unserer Jury ins Finale des internationalen "Au Pair of the Year" Awards 2011 gewählt. Jedes Jahr kürt die International Au Pair Association (IAPA) das weltweit “Best Au Pair of the Year" und Simone gehört zu den 3 Finalisten.

Simones Gastfamilie aus San Diego, CA, kann sich ein Leben ohne sie nicht mehr vorstellen und nominierte Simone für die renommierte Auszeichnung. Der Gastvater, der bis vor kurzem als Kommandeur auf einem Navy Schiff in Übersee stationiert und für sieben Monate von seinen 1-jährigen Zwillingen getrennt war, sendete mit seiner Nominierung diese Zeilen an Cultural Care Au Pair.  

Schau dir das Video zum internationalen "Au Pair of the Year" Award 2011 an:

Im Mai 2010 ist Simone in ihr Au Pair Abenteuer gestartet und seither berichtet sie regelmässig für euch aus den USA. Gerade hat sie sich entschieden ihr Jahr um 9 Monate zu verlängern.

Ein Jahr San Diego ist nicht genug -
auf geht´s in die Verlängerung

 

Es isch es Zitli här sit i zletschte mau gschribe ha was hie i mim neue Läbe in San Diego aues so geit, drum düemer das ize nachehole...

 

Es isch sehr viel passiert i de letschte Monet u mir si aui zimmli beschäftiget gsi... Letsch Wuche ich mi Hostdad dr Wayne hei cho vo sim Deployement. Er isch mit dr Navy 6 Monet z Bahrain gsi u isch nid hei cho di ganzi Zit. Es isch für üs aui e riise Fröid gsi daser ändlech wider deheime isch u mit sine Ching cha Zit verbringe. Es isch mega härzig gsi, obwohl d Ching ihn nid hei deheime gha für 6 Monet het di Chlini sofort Daddy zu ihm gseit u hetne kennt! Das isch für d Marian u mi e erliechterig gsi, das so z gseh, wiu mi weis ja nie wi d Ching reagiere. Am Sunnti heimer das natürlech de o gfiret une richtigi Party gha deheime, mit aune sine Fründe u Familie das isch mega schön gsi... 

 

Ir zwüsche Zit hei d Marian u i mit de Ching viel gmacht... Mir si zäme uf Los Angeles gfahre fürnes Wuchenänd u hei Hollywood unger d Lupe gno... Mir hei e Nacht im Hotel California verbracht was für mi absolut genial isch gsi!! Am nächste Tag simer zäme ufem Santa Monica Pier ga spaziere u hei de Fischer zuegluegt, was für d Ching sehr interessant isch gsi.

 

Vor knapp eme Monet bini ufne Roadtrip mit Fründe nach Oklahoma... Mir si hie z San Diego am Mittwuch gstartet u si zum Grand Canyon gfahre... Womer am Mittwuchabe si am Grand Canyon acho hets chli Schnee gha, i has fasch nid chönne gloube! Wär rächnet de scho mit Schnee in Arizona?? Ämu nid i! Item am nächste Morge simer am 5.00 ufgstange wiumer hei wöue dr Sunneufgang gseh, was absolut faszinierend u wunderschön isch gsi! Aber, es het di ganzi Nacht gschneit, so das mir am morge öppe e haube Meter Schnee hei gha! D Schneebauschlacht isch suuuuuuper gsi! I ha gar nid gwüsst wi fescht i dr Schnee vermisse! Das ja z San Diego immer schön warm isch. Ufaufäu isch dr Grand Canyon absolut faszinierend, es isch riiiiiiiisig u es gseht us wi es wunderschöns Gemälde! I bi eifach nume detä gstange u ha gstuunet!

Witer isches nach Santa Fee gange in New Mexico, es härzigs Stätli in New Mexico... Detä heimer fein gässe u d Nacht verbracht. Am Friti morge simer füreh losgfahre wiumer am Abe hei wöue in Oklahoma acho, aber mir hei zersch no müesse 12 Stung fahre, was e chli längwilig isch gsi, wiu Amerika het viiiiiiiiiiiiiiu Land wo absolut nüd isch, ussert Wüeschti u nach jedärä Meilä ä Fridhof, aber das isch de o grad aues! Am Abe simer aber de doch no in Oklahoma acho u afeng mau its Bett ga schlafe wiumer aui chli kaputt si gsi! Oklahoma isch eigentlech nid so interessant hani usegfunge wiu z einzige wos detä het isch Chirche u Restaurants... Es het detä ä Strass, mi fahrt 3 Meile u links u rächts isch nüd angers aus Restaurants! Es isch auso no idrücklech... Drum si di meiste Lüt detä o zimmli breit, ums mau nätt uszdrücke... Am Sunnti bini de ume hei uf San Diego gfloge u bi froh gsi ume deheime z si, wiu Oklahoma isch zimmli chaut gsi! U da i ja kener Winterchleider bimer ha, hani di meischti Zit gfrohre...

 

Im März hani mi de o definitiv entschide dasi no 9 Monet lenger möchti z San Diego blibe u das isch absolut dr Hammer! I blibe no bis nächst März! YAAAAAYYY!! I blibe i mire jetzige Hostfamily wiu mir eifach aui so ats Härz gwachse si u i gärn bi ihne bi! I hami o entschide z San Diego z blibe wiu i mitlerwile o mini Fründe hie ha gfunge u die o nid so eifach möchti ufgä!  

 

Iz bin ischo 11 Mönet hie u d Zit isch wi im flug umegange! Mängisch chunntsmer so vor wi we d Wuche eifach so näbe mir düre düse u i gar nid gnue Zit ha zum aues mache woni no wet! Es isch ufaufäu immer no aues wunderbar hie u i wetti gar nüd a mim jetzige Läbe ändere oder mini Entscheidig hie häre z cho, rückgängig mache! Es isch immer no di beschti Entscheidig woni je ha gmacht i mim Läbe!!

 

Liebs Grüessli usem Summerlech San Diego

Simone  

 

Change of Command, Yosemite, Halloween

(November 2010) 
 
Mis Läbe z San Diego isch vo letschts grad e chli stressig gsi... Im September isch mi Hostdad, (er isch Commander ufeme Navy Schiff) beförderet worde u drum si sämtlichi Familiemitglider vo mine Hosteltere z San Diego gsi... Dr Change of Command isch ganz öppis spezieus gsi, das isch e traditionelli Navyzeremonie wo
eifach wunderschön isch. Das heimer natürlech usgibig gfiret mit aune Familiemitglider!

Nachem Change of Command het mini Hostmom für üs aui im Yosemite Nationalpark Ferie buechet u de simer grad los gfahre. Yosmeite Nationalpark isch wunderschön, es isch eine vo de wenige Orte z Kalifornie wome würklech Saisons gseht, das ja bi üs z San Diego immer öppe glich warm isch u mir nid würklech Saison wächsle hei isches sehr schön gsi z gseh wi aues richtig Herbst zuegeit... Im Nationalpark heimer Bäre, Reh u Wildsöi gseh frei umeloufe. Dr Bär het mi persönlech am meischte beidruckt dame das ja nid grad au Tag gseh, wiud umhärstreunendi Bäre :-)
Witer isches de nach San Francisco gange womer grösteteils Sightseeing gmacht hei, Alcatraz (nid mi Favorit) heimer agluegt, aber bi de froh gsi woni ume vo derä Insle ha furt chönne. Am beste heimer d Cablecars gfaue z San Francisco, das si  d´Strassebahne wome aube im Ferhrnseh gseht wome eifach cha druf u drab springe! Das isch mega cool gsi! Da ja San Francisco chli es Wäuetau isch mit de Strasse, es geit uf u ab, isches mit de Cablecars mega luschtig dame immer chli es komisches Gfüel het weme dr Bärg ab geit, hoffentlech hei di Kabel u d Bahn geit nid kapput! 
 
Iz im Oktober isches hie ume chli ruhiger worde, mi Hostdad isch ize z Bahrein ide Arabische Emirate für 7 Monet u chunnt o nid hei, das heisst i bi mit mire Hostmom u de Zwillinge immer elei. Am Afang isch das chli komisch gsi u o sehr emotional... Aber mitlerwile heimeris aui dra gwöhnt u mir düe regumässig mite Zwillinge Skype, das si Daddy gseh u o nid vergässe! Mitlerwile chöisi scho
fasch loufe u es isch faszinierend wi schnäu das si wachse! Woni bi acho um May sisi nume ufem umegläge u hei nid mau chönne elei hocke, u ize loufe si beidi scho fasch!

I bi immer no dr Meinig das i mi richtig entschide ha e Nanny zwärde für di zwöi Zwärge! I bi ize scho fasch 6 Monet z Amerika u immer no, fasch au Tag erläbeni neui Sache, obs mit de Ching isch oder mit Fründe woni hie gfunge ha! Klar isches am Afang schwirig gsi, mit dr Sprach u aues Neue, aber mitlerwile hanis mir hie guet igrichtet u ha o würklech ganz liebi Lüt u Fründe kenne glert!
 

Simone- klein 240x100


Letscht Wuchenänd isch no grad Halloween gsi, das isch wahnsinnig wid Amerikaner sich für dä Tag vorbereite! Fasch jedes Huus isch dekoriert mit auem mügleche Spookie Stuff, u aui si verchleidet! Mir si mit de Zwillinge am Abe uf Trick and Treat Tour, (das isch denn wed Ching sech verchleide u vo Hustür zu Hustür go u für süessi Sache frage) u es isch würklech wi im Fehrnseh, genau glich! Am spetere Abe bini de mit Fründe ufne Halloween Party in San Diego Downtown, Monsterbash het das gheisse! Es isch e Streetparty gsi mit öppe 15 tuusig lüt uf ein Hufe u jedä isch verchleidet! Es isch absolut geniau gsi! I persönlech liebe
Halloween z Amerika wiu würklech aui vercheidet si u tiuwis isches faszinierend wasech d lüt löh la ifaue für ihres Kostüm!
 
Bis gli ... Simone

Zoo, Züpfe unes 1. Ouguschtfescht

(August 2010)

I bi ize sit fasch 3 Monet z Amerika u es isch eifach super hie! I erläbe jedä Tag neui Sache mit de Kidds u am Wuchenänd bini meischtens ungerwägs zum irgendöppis aluege. Mini Täg woni mit de Zwillinge verbringe si vou mit wunderschöne Momänte, zum Bispiu gö mir viu zäme i Zoo wo mir immer wider Tier entdeckä womer vorhär no nie hei gseh! Dr San Diego Zoo isch eifach riiisig u het hunderti vo Tierarte wome cha bestuune. D´Marian mini Hostmom isch mitlerwile wider am schaffe u i bi fasch dr ganz Tag mit de Zwillinge eleini. I hanes Outo zur Verfüegig woni immer darf bruche u drum simer o geng chli zäme ungerwägs! Hüt bini amene Playdate gsi mit angerne Au-Pairs u ihrne Ching. Mi trifft sich de ufeme Spiuplatz u ds schöne isch dasme sich ungerenang chli cha ustusche u Sörgeli u Problemli cha diskutiere während me mit de Ching duet spile! Es isch immer interessant z ghöre wis de Angere Au-Pairs so geit, wasi so mache... I ha hie mitlerwile o es paar Lüt kennä glert u das git mir e guetä Usglich zu mim Job aus Nanny. Letscht Wuchenänd simer z Palms Springs gsi, u hei d Wüeschti mit Ihrer ganze Vielfalt kenne glert! Palms Springs ligt ir Wüeschti u drum isches o sehr sehr hei, öppe 45C !! Mir hei dr ganz Tag am Pool verbracht u am Abe simer de zäme i Usgang. Äbe Usgluch zum Autag mit de Kidds. Nach somene schöne Wuchenänd freutme sich de grad dopplet di Chäfere wider z gseh u mitne Zit z verbinge, z spile u Spaziergäng z mache.

AP-CH-Simone-HF

Ja mis Läbe hie z San Diego woni hie darf ha isch eigentlech jedä Tag es chlises Wunder! I stuune immer no wi guet dases mir hie gfaut u das isch nid z letscht o dr Verdienscht vor Marian mire Hostmom! D´Marian isch eifach grossartig i aune Wäge wome super cha si! Klar es isch e Umstellig vomene Läbe Deheime z cho, wome vilich e eigeti Wohnig, es eigets Outo u o aui Fründe umsech um het gha, aber i cha mit dr Marian eigentlech über aues redä u si versteit mi o, weni mau hei we h ha oder nacheme stressige Tag mit de Kidds eifach müed bi. De sitze mir zäme u redä über Gott und die Welt, auso meischtens über Amerika u d´Gschicht.

Letscht Sunnti isch ono 1.Ouguscht gsi u d Marian u i hei e Party gmacht zu däm spezieue Tag! D´Marian het Fründe zum Znacht iglade u i ha Züpfe, Fondue, Bratwürscht u 1. Ouguschtwegge gmacht! Züpfe z ässe u o Fondue isch eifach mega fein gsi, dame das hei niene cha choufe isches dopplet so guet gsi wi Deheime gsi u aui heis mega gärn gha! So richtigs Brot gits hie nämmlech nid! Mir hei e super schöne 1. Ouguscht gfiret u drum hani gar nid müesse hei weh ha! :-) Ja i weis dasi hie am richtige Platz glandet bi u freue mi jedä Tag öppis neus z erläbe...
Bis gli......Simone

AP-CH-Simone

Gschichte vo änetem Teich

(Juni 2010)


So, 4 Wuche isches ize här woni ha müesse tschüss säge und das isch nid grad so luschtig gsi.
 
Ja es isch auso e sehr verwirrendi Wuche gsi nid z letscht wel alles eifach neu isch, alles vel grösser isch, alles anderscht isch und wels soooo vel neui Idrück uft di abe rägnet dasde gar nid nachemagsch mit verarbeite. D’Schuel isch guet gsi, mir hei sehr vel über di amerikanischi Familie glernt. D Mirel, üsi Lehrerin, isch mega luschtig gsi und het üs sehr vel bibracht über Chind und was alles dezue ghört. Mir hend bastlet, Videos gluegt und hei üsi Familie enand vorgstellt. Was sehr guet isch gsi, mir si i Klasse ufteilt worde nach Ort womer häre gönd, drum heimer scho i de Schuel chli chönne Fründschafte schliesse und de am Fritig all zäme reise...

De Donnstig isch super gsi, da simer z New York gsi, WOW no nieh het mi e Stadt so beidruckt und erschlage zu glich! Mir si ufem Timesquare gsi, es het tuuuuusigi vo liechtli und TV`s detä gha und lut isches a allne Orte hets Musig, ja ungloublech! D’Freiheitsstatue simer ga aluege, uf dr Fähre nach Long Island heimer New York und Manhatten chönne bewundere und nocher simer no am Ground Zero gsi, i ha welle es Föteli mache vo de ganze Bousteu, es isch unmüglech! Es isch eifach riisig und hunderti vo Krän und Grüscht hets dete! Du steisch eifach vordranne und dänksch:"Wow!" Aschliessend simer ufts Rockefeller Center ufts dach ufe 67 Stockwerk höch, meh het e fantastischi Ussicht über alles det obe! Ah nocher simer natürlech no ga shoppe, was werklech sehr guet isch, au im gröschte M&M´s Store vo de Wäut simer gsi, het eifach 2 Stockwärch vou, alles was dis Härz begehrt mit M&M´s, Socke, T-shirt, Tassli, Hose, Schlüsselahänger, Täsche und so Züg! Was au immer du möchtisch chasches ha, eifach mit M&M`s Print drufe... Und natürlech bi Victorias Secret`s simer gsi, z Paradies für üs Fraue überhoupt, i bi detä ine cho und ha gmeint i sig imene Märli glandet!! So nocher heimer scho baud ke Zit meh gha aber hei no unbedingt : i Love NY t-shirts welle choufe e rise Stress heimer gha wel mir hei ja nid öppe welle de Bus verpasse wo  eus wider het i d’ Schuel zrug bracht! T-Shirt heimer du doch de no gfunde und mir si happy gsi! Ja ohni i Love NY T-Shirt ume ga, GEIT GAR NID J!!! Ja es isch würklech en schöne Tag gsi... Aber im Bus het niemer es Wort gred am Abe, so erschlage simer gsi!

Am Fritig simer scho am morge am 9.15 i d’Schuel abgfahre obwou üse Flüger ersch am 14.30 isch gange, füf Stund umeghange am Flughafe dr Troum vo jedem Reisende! :-) Bi afeng am haubi 11i am abe z’San Diego acho und bi mega kaputt gsi, au mitem Zitwächsu no einisch. Das isch grad chli vel gsi!

Aber i bi mega härzlech empfange worde, vorallem vo de Marian, das isch mini Hostmom. Auso beidi si mega nätt und interessiere sich für alles was bi üs deheime so geit und wi mir läbe und so, mir hei au sofort es Gspräch gfunde und hei de am abe no so bis am 1.00 gredt über alles mügleche! Si het mis Zimmer au ganz härzig igrichtet aune Orte si Föteli ufghänkt gsi vo deheime vo mine Fründe und mir, vo minere Familie, nocher het sie mer 2 Starbucks Tassli kouft und die si vou gsi mit Menthos, eifach z’vel... I ha ja mega gärn Menthos! Ah und natürlech no Schoggi! Si het gmeint für einsami Nächt oder Heiwehstunde!
I ha au es eigets Bad und de het sie mer mini Tüechli mit mim Name la besticke, es isch alles violett und uf jedem Tüechli steit mi Name... Ja sie isch würklech sehr lieb...
 

Woni i mim neue Deheime bi acho, hani natürlech au d Chind welle gseh, nume isch leider scho 23.30 i de Nacht gsi drum hani eifach schnäu di schlafende herzige chend gseh...

Am nächste morge isch es losgange, i ha no chli unter mim Jetlag glitte aber mir si mitte Kiddies zum Babygym gfahre u das isch e super Start gsi i mis neue Läbe und mi neu Job! Mir hei zäme dr Samschtig verbracht und i bi sooooo erliechteret gsi das d Chind au sofort guet hei uf mi reagiert! Es isch no schwirig z säge bi chline Bebes wo erscht 8 Monet aut si, aber si hei kes einzigs mau brüelet woni sie ufem Arm ha gha und das het mir es guets Gfüehl gä! I bi iz sit 3 Wuche da und es isch jedä Tag wider ufts neue es Abentür... Momentan isch ds Mami no deheime und nume so vo Zit zu Zit unterwägs! I denä Zite gömer zäme ga spaziere, i Zoo oder i Park ga d Tierli aluege und da hei sie jedäs mau sehr Fröid! I freue mi uf di kommende Monet i derä glückleche Familie und freue mi e Teil dervo z si.

 

Unsere "Au Pair Jahr Gewinnerin" steht fest!

Simone_winner

Simone, gratuliere zu deinem Gewinn! Wie fühlst du dich kurz vor deiner Abreise?
Mittlerweile ist alles Organisatorische geregelt und ich freue mich einfach nur noch endlich meine Gastfamilie sehen zu können und zähle schon die Tage bis ich endlich abfliegen darf :-).

Warum hast du dich für ein Au Pair Jahr entschieden?
Ich weiss ich habe für mich die richtige Entscheidung getroffen ein Jahr nach Amerika zu gehen um Land und Leute kennen zu lernen. Ich hoffe dass es für mich einfach ein tolles Jahr wird, mit vielen neuen Eindrücken, Erfahrungen und lieben Menschen. Auch auf das Reisen freue ich mich, Neues kennen zu lernen und zu sehen.

An dieser Stelle möchte ich auch gerne sagen das Cultural Care einfach toll ist, ich hatte so viel gute Unterstützung bei allem was ich erledigen musste vor der Abreise (was eine Menge ist). Merci viel mal.

Wir wünschen Simone eine unvergessliche Zeit!

Simone hält uns aus den USA auf dem Laufenden und wird ihre Erlebnisse als Au Pair hier mit euch teilen - viel Spass beim Lesen!



Zurück